असांखे पहिंजो हकु मिले

पहिंजो सिन्धी समाज राजनीतिक पार्टियुनि सां पहिंजे सिन्धी पार्षदनि लाइ घुर करे

special-editorial-nagar-nigam-election

पहिंरी खां नगर निगम जूं सीटूं भी वधियूं आहिनि, पहिंरी 91 सीटूं हुयूं, हाणे परिसीमन खां पोइ हेरिटेज निगम ऐं ग्रेटर निगम खे मिलाएं 250 सीटूं थी रहियूं आहिनि त पाण खे टिकेटूं भी पहिंरी खां वधीक खपनि।

नारायणदास पारवानी (प्रबंध संपादक)


जयपुर नगर निगम जा चुनाव जल्दी ही थियण वारा आहिनि। पहिंजे सिन्धी समाज खे हुनमें केतिरो प्रतिनिधित्व मिलन्दो याने घणनि सिन्धियुनि खे पार्षद लाइ उम्मीदवारी राजनीतिक पार्टियूं दीन्दियूं। इन्हीय ते विचार करे राजनीतिक पार्टियुनि खे दबाव दियण लाइ अञा ताई काई सिन्धी हित में कमु कन्दड़ संस्था अगियां कोन आई आहे जहिं समाज जे राजनीतिक कार्यकर्ताउनि खे हिक मंच ते घुराए ऐं पहिंजे समाज जे अगवाण शख्सियुतुनि खे आमंत्रित करे पाण में विचार-विमर्श करे कुछ निष्कर्ष कढे। जहिंसा सभिनी जी राय सां पहिंजो सिन्धी समाज राजनीतिक पार्टियुनि सां पहिंजे सिन्धी पार्षदनि लाइ घुर करे सघे।


राजनीतिक पार्टियुनि में सिन्धियुनि लाइ भा.ज.पा. जो विशेष महत्व है इनकरे जो सिन्धी शुरूआत जनसंघ खां वठी अधिकतर हुनजा समर्थक रहिया आहिनि ऐं समाज जा वधीक सिन्धी राजनीतिक कार्यकर्ता भा.ज.पा. सां लागापो रखन्दा आहिनि। पर हाणु घणई कार्यकर्ताउनि जो कांग्रेस सां भी लागापो आहे।
सिन्धी पूरे देश में टिरयल-पखिरयल हुअण जे करे एम.पी. ऐं एम.एल.ए. त घट मात्रा में आहिनि छो त सिन्धी कहिं भी क्षेत्र में एतिरा वधीक न आहिनि जहिसां हू एम.पी. ऐं एम.एल.ए. जो चुनाव सिन्धियुनि जे करे जीते सघनि। इनकरे राजनीतिक पार्टियूं भी जिताऊ उम्मीदवार खे वधीक तवज़ो दीन्दियू आहिनि त टिकेट उन्हीय खे ही मिली सघंदी आहे जेके सिन्धी समाज जा कर्मठ कार्यकर्ता पार्टीअ में तमाम ही समर्पित रहन्दा आहिनि।
हीयु कार्यकर्ता सिन्धियुनि जे अलावा बियनि कौमुनि सां भी समरस रहन्दा आहिनि ऐं हुननि जे सुख-दु:ख में कमु ईन्दा रहन्दा आहिनि। अहिड़नि पार्टीअ समर्पित कार्यकर्ताउनि खे पार्टी अगर एम.पी., एम.एल.ए. जी टिकेट न भी दिए थी त हू तदहिं भी पार्टी ऐं सामाजिक क्षेत्र में सक्रिय रहन्दा आहिनि त पार्टी भी कदहिं न कदहिं हुन जी सेवा खे तवज़ो दीन्दी आहे।
पर हीयु नगर निगम जा चुनाव आहिनि, हिन चुनावनि में घणनि ई वार्डनि में सिन्धी बाहुल्य क्षेत्र आहिनि जितां सिन्धियुनि जे वोट ते ही केरु खटे सघे थो त पाण पुठियां छो रहूं।
वक्त आहे त जीअं हर साल चेटीचण्ड जे मेले मनाइण लाइ समाज जोश में ईन्दो आहे त चेटीचण्ड पहिंजे समाज जी एकता जो पावन पर्व आहे जहिंखे पाण सिन्धी इन्हीय करे ही सिन्धियत दींह मञी करे हर हन्द पूरे देश-विदेश, शहर-गांव, नंदे-वदे गोठ में संगठित थी करे दिलचस्पी वठन्दा आहियूं। उन्हीय वांगुर हीयु भी पंजे साल जे इन्तजार खां पोइ ईन्दड़ पर्व आहे। अजु राजनीतिअ में पाण पुठियां आहियूं, राजनीति भी व्यापार वांगुर पाण लाइ जरूरी आहे।
घणई मुश्किलातुनि जो समाधान राजनीतिअ करे थिये थो। त पहिंजो व्यापार भी सफल तदहिं रहन्दो, पुरुषार्थ करे कमायल धन सुरक्षित रहन्दो अगर पाण वक्त आयो आहे इन्हीय तरफ भी ध्यान दियूं, दिलचस्पी वठूं, कुछ कदम वधायूं। न त पंजनि सालनि ताईं वरी पिया हथ हणन्दासीं।
पहिंजा पार्षद हून्दा त पहिंजू परेशानियूं हल थियण में सहूलियत रहन्दी, बिया पार्षद एतिरो सिन्धियुनि जे करे कोन गाल्हाए सघंदा जदहिं कि पहिंजे सिन्धी प्रतिनिधियुनि लाइ पहिंजे समाज जो हदु खिचजंदो। राजनीतिअ में भी पहिंजे समाज जा घणई सुठा, कर्मठ, सक्रिय, समर्पित कार्यकर्ता आहिनि तिनिखे समाज थोड़ो सहारो देई अगियां वधाए त हू समाज जा भी थोराइता रहनि।
सिन्धी हित में कमु कन्दड़ संस्थाऊं अगियां अची करे इन्हीय विषय त सभई मिली करे कुछ कनि, मिली करे सभई निष्कर्ष कढनि अन्यथा राजनीतिक पार्टियूं पाण खे केतिरो तवजो दीन्दियूं, इहो हुनजे मथां निर्भर आहे या वरी हुनखे पहिंजे लाइ केरु प्रत्याशी मतलब जो आहे, उहें ई कन्दियूं
छो त राजनीति सिर्फ सिन्धी क्षेत्र में कहिंजी साख आहे, केरु वधीक नि:स्वार्थ सेवा थो करे इन्हीय ते घट गौर करे एम.एल.ए. जो केरु प्रिय आहे, केरु मालदार आसामी आहे ओदाहुं मुड़ी वेन्दी आहे त समाज जा लायक प्रतिनिधि वंचित रहजी वञनि था।


पहिंरी खां नगर निगम जूं सीटूं भी वधियूं आहिनि, पहिंरी 91 सीटूं हुयूं, हाणे परिसीमन खां पोइ हेरिटेज निगम ऐं ग्रेटर निगम खे मिलाएं 250 सीटूं थी रहियूं आहिनि त पाण खे टिकेटूं भी पहिंरी खां वधी खपनि। हीय वक्त जल्द ही हथनि मा निकरी वेन्दो इन्हीय में देर न थिए अन्यथा हरको चवे थो त मा दावेदार आहियां ऐं जिते किथे पार्षदनि लाइ लाईन लगी पेई आहे त पार्टी भी कहिंखे राजी करे कहिंखे नाराज करे किथे इहें न थिये त इन्हीय सां भी पाण पुठते रहजी वञूं।


इन्हीय करे समाज निष्कर्ष कढे, इहो कठिन जरूर आहे पर आहे आवश्यक। पाण खे आबादीअ जे हिसाब सां 10% सीटूं त खपनि ही याने घट में घट 20-25 सीटूं त हुजनि ई, कहिं वार्ड में सिन्धी घट भी त असीं भी बियनि खे वोट दियूं ही था त पार्टीअ जे बैनर ते बिया भी असांखे वोट जरूर दीन्दा। कुल मिलाए असांखे पहिंजो हकु मिले।

कोई जवाब दें

Please enter your comment!
Please enter your name here